من قلب العاصفة بقلم جورج يونس

عالثلج وعي السِمُنْ فوق الجبال

طُلِعْ يفتش عالصيادي

مش عارف إنو منهم كتار

تركونا وراحوا ع عالم تاني

خلفهم بقي الخرطوش غامر التراب

يفتش ع ريشة شي عصفور

بعدما البارود هجر حشواتو

والشتي غسل مع الوقت ألوانو

تيصفي الهجران وحدو رفيق جلساتو

بالجرد غفية موقدة صياد

مشتاقة لحطب هاك السنديانة

ورماد عمرو سنة غمرو البياض

ودعسات بالصور تحت النفناف غرقانة

يا وعد خليك واعي خلف الحلم

ع حباب ع القمم كانت سهرانة

ومن بعد ما هاجروا من هون

تركوا للذكرى شلحات مجد بردانة

بعدها تحت شموخ الأرز غفيانة

والبدلة اللي معلقة عالحيط

خلف باب القبو ال سكنتو ريحة العطني

بتعانق جفت بعدو ناطر الهداف

لتسألوا ليش الغربة نامت ع زنادو

وبقلب العتمة بعدا الجعبة سهرانة

خف حملا كتير عن الموسم الماضي

والخردق الباقي فيها حاكى حنينو

لدخنة مشحرة بتلال وطننا المقصبي

بسواعد رجال كانت عالأرض سهرانة

ومن قلب العاصفة شق البياض طريقو ع قلوبنا

يزرع أمل بوسط الزعل ع دروبنا

يمكن نقدر بعد بهالمطهر اللي سمولنا ياه وطن

نعيش شوية سلام وحب يداوو جروح ما بتنوصف

وبعدها وقت ال بالخالق نرجع نلتقي

رح نشكي وجع تجار باعوا الهوية والوجود والحجر

وإشتروا بدنيا الفنا شوية كراسي ليظلموا فيها أشرف بشر

هلقد بحبك يا لبنان